آهـــــــــــــــات
ورباعيـــــــات
إهداء
حياة الإنسان مسرح كبير يقابل فيه
الصالح والطالح فمنهم من يكون سبباً فى سعادته ومنهم من يكون سبباً فى تعاسته ..
فإلى كل من كانوا سبباً فى سعادتى أهدى إليهم ديوانى هذا ، كما أهديه لكل من سبب لى
ألماً لآنه بأفعاله هذه فجر بداخلى طاقات كامنة فأخذت تطفو وتظهر على السطح معلنة
ميلادها وميلاد هذا الديوان الحزين .
فأوجه الشكر والعرفان لكل من ساعدنى
ووقف بجوارى لخروج مولودى الأدبى الخامس إلى دنيا الإبداع والتميز ، وأهدى جميع
المخلصين تحياتى واحترامى .
الشاعر
محمد شرف الدين الكراديسي
**
مقدمة المؤلف
الرباعيات الشعرية
هي أشعار من الشعر العربي والعامي
الحديث تتصف بوجود أربع أسطر من الشعر تقدم فكرة بسيطة ومن الشعراء الذين كتبوا في
هذا الأسلوب الشعري الشاعر صلاح جاهين - الشاعر نبيل خلف - الشاعر أحمد وائل - الشاعر
العراقي عادل الدرة)
حين نتأمل فن (الرباعيات الشعرية) ذات
الأبيات القليلة والخبرة الإبداعية الطويلة وما تحمله من تجربة إنسانية وخبرة
عالية في ممارسة الشعر، نجد أنها تحتل جملة من الانفعالات النفسية والعاطفية
المتدفقة، واللغة الباذخة والصور الحية فتبرز مقدرة الشاعر على إخراج ما تجيش به نفسه
فتنصاع له قريحته وهذا لا يتأتى إلا لؤلي العزم من الشعراء المطبوعين الذين باتت
قرائحهم رهن إشارة منهم.
فالرباعيات نوع من الشعر مشهور في
الشعرالفارسي
والرباعية مقطوعة شعرية من أربعة
أبيات تدور حول موضوع معين، وتكوّن فكرة تامة. وفيها إما أن تتفق قافية الشطرين
الأول والثاني مع الرابع، أو تتفق جميع الشطور الأربعة في القافية.
لكن المتأمل للحركة الشعرية اليوم يرى
أن هذا الفن (الرباعيات) قد أدركه النسيان فغدا أقرب إلى الاندثار
والرباعيات نمط عرفه الشعر العربي
مستوياً مؤثراً وفي تصويري أنه دفقة شعورية مشحونة بالجمال فلا تكاد تنتهي حتى
يتنفس المتلقي ملء رئتيه إعجاباً وحتى يبتسم بوسع شدقيه طربا وإكباراً.
وبناءا على ما سبق أقدم لكم هذا
الديوان المتنوعمن الرباعيات الشعرية باللغة العامية
وأرجوا أن ينال رضاكم والله ولى التوفيق .
الشاعر
محمد شرف الدين الكرا ديسي
الكتاب
******
الكتاب أجمل صديق
هو صاحبك فى الطريق
وإوعى تسهى مرة عنه
هتلاقيه أجمــــــل رفيق
**********
الرجولة
**********
اشارة منى تهز الجبل لو كان
مثل الزمن ناشف وليه عمدان
خليك جامد وإوعى تخاف ياابنى
وخلى الرجولة هدفك كمان عنوان
************************************
ياحبيبتى
*********
ياحبيبتى لسة عايشة فى الضلام
ولا صورتك راح تطير فوق الغمام
حُبك إنتِ فرض عين ع الحبايب
ومن غيرك إنتِ راح أكون زى الحُطام
******************************
الحــــــرامى
*************
يادنيا فيكى العجب فيكى الشريف مقهور
حتى الحرامى ياناس دا صار كمان مشهور
وإن جيت فى يوم تلومه يقولوا دا معذور
العذر فى حد الإله أصبح دا شئ ميسور
*****************************
الفُرقة
********
قالولى ابعد والبعـــاد
دا صعيب
قلبى بيبكى ع
اللى راح وحبيب
البعد ممكن
يكون دوا وعلاج
والفرقة مُرة ع
البعيد وقريب
********************************
القلب الأخضر
***********
القلب الأخضر
بيلالى
والخد الأحمر
يحلالى
وجمالها حلو
بيخطفنى
نسانى كل اللى
جرالى
*****************************************************
الشيخ الولهان
***********
قالولى ياشيخ
إوعى تكون نشوان
أنا قلت مالى
أنا ونشوة النسوان
يحرم علىَّ
الحب بعد حبيب روحى
لأحسن يقولوا
دا شيخنا دا ولهان
*********************************************
يادنيا
*******
يادنيا مالك
كــــــده بتبهدلى فيه
كل ما أقدم خير
ألاقيه أذية ورزيه
وإن قلتلك بحبك
ألاقيكى راح تشخطى
ومش هآمن
يادنيا وكرهى ليكى شويه
**********************************************
أناديلك
******
نهارى وليلى أناديلك
يا بدر منور قناديلك
بحبك حب مش عادى
يوماتى اقعد أغنيلك
****************************
ألف وأدور
*******
إحتار قلبى مع الحلوين
أبص شمال أبص يمين
وألف وأدور حوالين نفسى
ألاقى قلبى نقل ليمين
**********************************
أدوق المُر
*******
أمينة حبيبتى على حبى
ودايما ف المحن جنبى
أدوق المُر تتألم
ودايما قلبها بقلبى
**********************************
كلمة الحق
********
كلامى ف الهوا طاير
عشان الحق أنا حاير
أقول الكلمة تأذينى
وأخرة الصدق نتعاير
****************************
رزانة عقلى
**********
رزين ياعقلى ونافعنى
لكل كلامى تسمعنى
حتى ف لحظة طيش
تخدنى للنار
وتلسعنى
********************************
حبيب أسمر
*********
عينى شافت حبيب أسمر
فى قلب الظلمة متمسمر
أتارى يا ناس نظرى اختل
وشوفت حبيبى راح يسكر
*********************************
سِنه متخلع
*******
عجــــوز ماشى بيدلع
بنـــار الحــــــب بيولع
تقوله عيب على سِنك
يضحك وسِــنه متخلع
************************************
خراب البيت
**********
خراب البيت مش ساهل
ولازم كله يتساهل
مع الأزمات نكون أحباب
ولو سبنا يبقى نستاهل
**********************************
قدر ونصيب
*********
صدمنى قولك أعز حبيب
تقولى راجع وناوى تغيب
أنا كنت فاكر كلمتك صادقة
أتارى غيابك قدر ونصيب
***********************************
قمر سارح
********
شوفته بعينى بجماله
قمر سارح ف مواله
أقوله بس نظرة عين
يتقل ويسوق ف دلاله
*******************************
خيانة الحب
*********
رديئة جدا خيانة الحب
ألم واخد مكان ف القلب
تحس القلب متخلخل
كإنه طوق فى رقبة كلب
****************************************
الكلب
*******
الكلب برضه وفى وأمين
ويحميك من الحاقدين
تشوفه يهزلك ديله
كأوفى صديق وملو العين
*************************************
هاجرنى وناسينى
***********
قلبى بيريده وجافينى
ومطير النوم من عينى
أسهر أكتب له موالى
يهجرنى ويعمل ناسينى
***********************************
أمرنى الحب
********
أمرنى الحب أفتح له
بيبان قلبى وأوسع له
ويسكن جوة ركن هناك
وغصب عنى أخضع له
*************************************
قلبه القاسى
*******
بريده والله ياناسى
وهو ف الهوا ناسى
بشيله جوا نن العين
وقلبه ع الغرام آسى
*******************************
العين عشقت
*********
العين عشقت قسماته
ودوب قلبى ببسماته
ياريت يحس بيا يوم
وتحضن قلبى لمساته
**********************************
أنين الحب
*********
أنين الحـــــــب كوانى
بنار البعد ســــــــوَّانى
ضعيف ف الهوى قلبى
وشِـــــــبت قبل أوانى
*****************************************
سجان الهوى
*********
سجان الهوى سجنى
ف بحر غرامه أسرنى
وسبنى أنا ليل ونهار
دا عشقه والله مجننى
****************************************
الحافى
*********
أكلته من
لحـــــــــــــم كتافى
وطول عمره كان
طبعاً حافى
وجفانى وســب
اللى جابونى
بصراحة طبعـك
مش صافى
**************************************************
قِسم ونصيب
**********
الدنيا دى قِسم ونصيب
مـرة تخيب ومرة تصيب
والرزق من عند الإلــــه
إدعيه وهـو راح هيجيب
*********************************
مـرة تخيب ومرة تصيب
والرزق من عند الإلــــه
إدعيه وهـو راح هيجيب
*********************************
المصباح
*********
الجـــهل عـــم
وفـــــاح
عايشين كمان فـ
براح
والعــــلم هو
الأســـاس
فـ الضلمة صار
مصـباح
**************************************
نفسى أغادر
**********
نفسى أرَّوح
نفسى أغادر
ربى عالم ربى
قادر
والشفيع سيدنا
محمد
والدوائر على
كل غادر
*******************************
مزاجات
*********
الدنيا دى
مزاجات
للحاضر واللى
فات
مزاج يعيش
متدين
ومزاج يعيش
لذات
***********************************
عناد ولادك
**********
يامصرحافظى على ولادك
كفايه حزنك كمان سهادك
والشـباب مضحوك عليهم
عناد ولادك دا فاق عنادك
********************************************
حبيبى هيعود
***********
إلـــــهى
هـــــــو الموجود
وحبيبى أنا راح
هيعــــــود
هيعود وهكون
راضى عنه
بعـزيمة زى
الــــــبــــارود
****************************************
أنا ندمان
*********
هيمان فى حـب
الله
وطالب دايماً
رضاه
هو الرضــا
والأمان
ياســـــعد من
ناجاه
********************************************
الونيس فـ
البيت
*************
الكمبيوتر
شـــــــــــكالى وقــال أنا مليت
نظرتله وقولتله
إنت الونيــس فى البيت
من غيرك إنت
أمـــــوت والوحدة قتلانى
يارب إنت
المعين إليك شــــــكيت وبكيت
********************************************
يوم الجمعة
********
الجمعة دا
يـــوم فى الأسبوع
ودعــــائك هيكــون
مسـموع
وتعالى إليـــه
وإبكى كــمـــان
وناجيه
بدعــــــــــائك ودموع
**********************************
قلبى الحزين
***********
العيون
السهرانين ويا أشــجان القمر
والأيادي
الشقيانين أرضها تطــرح ثمر
هما دول
التعبانين يابلد أمرك عجب
يا إله
العالمين قلبى م الحزن ضمر
***********************************
عشمى كبير
**********
أنـــــا
مذنــب وذنبى كبيـــر
إلهى غلطت
بـــــدون تفكير
وعشــمى كبير
فى غفرانك
وســاعتها
ذنــــــوبى تطير
*********************************************
باب التوبة
*********
من الناس
أنــــــا هـــــارب
عصير
التـــــوبة أنا شارب
وبابـــــك ربى
مفتـــوح لى
دا بــــاب
عمره ما يتوارب
*****************************************
الحياة
******
الحياة لســــــــــة جميلة
فيها ناس برضه أصيلة
حِب غيرك برضه تلقى
للســـــعادة ألفين وسيلة
**********************************
الأمل
******
الأمل لســــة في بكرة
بس اســمع منى فكرة
خلى قلبـك بس أبيض
والخلايق هتبقى أُسرة
*************************************
ربى الغفار
**********
ناجيت إله ســــــــتار
إغـفر لى ياغفـــــــار
فسمعت هاتف ينادى
غفرانى صــــار أنهار
************************************
الحلوة
********
سألت الحلـــــوة إنتِ منين
قالتلى إنتَ عليـــــك العين
حيرت قلبى وفكـرى معاك
وشغلت بالى حبيبى سنين
****************************************
عمى
********
طلبت إيدك م الغالى
بص وقالى تعالالى
والله شـارى ياعمى
فقالى خدها طوالى
*****************************************
الحب مات
**********
الحـــــب مات وانداس
بعد ما كنــــــا بننباس
ودوقنا مُر الســــــنين
وللكره برضه أساس
*************************************
مهب الريح
***********
حبيبى ضاع فـ مهب الريـــح
وكلامه صادق برضه صريح
ولحـد إمتى هعيش فـ العتمة
وعدوى عايش فـ المصابيح
*************************************
الصبر
*******
حبيب حيـــــــــاتى بفكر فيك
سهران لوحدى وقلبى عليك
هـــــدعى إلهى يصـــــــبرنى
والشـــــوق يجيلك ويصحيك
*********************************
الواطى
*******
كلامه معســــول وكمان بكاش
وأنا عمرى ضـاع وياه ببلاش
وكمان كــداب وخسيس ولئيم
وبيت الواطى مـــــــا بيعلاش
*****************************************
إلزم حدودك
*********
راحت فين بس وعــودك
والعذاب دا صار وجودك
والفراق دا زاد أســــــايا
يااللى كنت ، إلـزم حدودك
**************************************
حبيبى
********
دا حبيبى بيهجرنى ويشكى
ولما بشوفه بيجرى ويحكى
قال إيه عايش فـ عذاب وحده
شارب بيرة وكمان ويسكى
**************************************
سوق دلالك
*********
لما عينى بتشــــــــــوف جمالك
وقلبى يطلب على طول وصالك
والعنـــــــاد دا طبـــــــع فيـــــك
وكمان حبيبى بتســـــوق دلالك
******************************************
أبوس إيديكم
*********
ياللى كنتم فى يوم أحبــــــــاب
مع الســــــــلامة ذهاب وإياب
وأبوس إيديكم إياك تنســــــوا
تاخدوا فى إيديكم كمان الباب
**************************************
قلبى حزين
*********
قلبى حزين ع اللى فاتونا
نسيوا اللى كان ونسيونا
وأنا راح أنــادى لحبايبنا
ياحبايبى إنتوا خسرتونا
***********************************
قلبى
******
قلبى عزف ألحـــــــان وحنان
لما عينيكى شــــــافتنى زمان
وإنتِ تقــــولى دا قلبك خـاين
قلبى فى حبك عمره ما خـان
**********************************
هاتى
********
إنتِ أملى وكـــــــــــــل حياتى
راح أناديكى وأقـــــولك هاتى
هاتى حنــــان وهـاتى محــــبة
معاكى حبيبتى نسيت نزواتى
***************************************
الغرام
******
من الغرام عاوز لى حبه
وأنا قلبى داب من الأطبه
بس نظرة تشفى جروحى
ودا علاج كـــــــل الأحبه
************************************
إياك تشكى
********
الطريق على طــــــول مفتوح
وقلــــبى عليل مليان بجروح
حِب تانى وإيـــــاك تشـــــكى
وييجى اليوم ياحبيبى وتنوح
************************************
سحر جمالك
*************
عقلى وقلبى بيــــــك مفتــــــون
يعنى خلاص أنـــــا بيك مجنون
ســــــــحر جمــــــالك دا مجننى
من غيرك إنتَ مش راح أكون
*******************************************
قلبى داب
**********
لما عينى شــــــافت عينيكى
أنا قلبى داب من حُبه فيكى
والحنـــــان فى قلبى زايـــد
وكيانى كلــــــــه بيحتويكى
**************************************
أنا هستناك
**********
مهما تغيب أنا هســـــــــتناك
عارف إنى مش هنســــــــاك
إنتَ حبيبى وحلـــــــم حياتى
قلبى ياعمرى دايب فـ هواك
***************************************
طاقة نور
**********
قلبى دا آسى سنين ودهور
ناسى الحشر كمان ونشور
ربى نـــادانى وقالى حبيبى
ارجع توب ودى طــاقة نور
**************************************
إوعى تخافى
**********
إوعى تخافى أنا بر أمانــــك
راح أحميكى الناس وزمانك
إنتِ حبيبتى وكـــــــل حياتى
تايهه حبيبتى وأنا عنوانــك
***************************************
حُبك ليه
*********
حُبك ليه كان مشـــــــروط
وإنتِ السايبة وأنا المربوط
كل ما قـــــــولك بس كفاية
تلعبى بيه عروسة بخيوط
****************************************
مرضى
*********
مرضى خلانى أصرخ وأقول مواويل
سهران معاه وحـــــــدى وليلى طويل
حتى القرايب والأحبـــة كمـان بعدوا
ما فضلش إلا شــامت كمان وعويل
**********************************************
العَدَلْ
******
البنت بتقول اجــــــــرى كمان يا زمان
نفسى العَدَلْ ييجى راكب كمان رهوان
وأكون ســـعيدة معاه والســــعد قدامى
ربك أجاب وجالها راجل صحيح انسان
******************************************
نويت ع الحب
***********
يا اللى نويت ع الحب الحب برضه جميل
وأنا اللى قلبى انكـــوا طــول النهار والليل
عشـــقت برضه الهـوا وقلبى صـــار مايل
عيان وعـــاوز دوا وطبيبى برضــه عليل
*************************************
طيور السما
*********
عصفور نادى وقالى اسمع يا مولانا
ربى إله الكــــــــــون وبخيره غطآنا
نظرتله وقولتله احمد إلــــه الكــون
إن الطيور فـ السما شاكرة وشبعانا
******************************************
يا طه
*****
يا طه دا نورك عالى
مالى الأماكن طوالى
ونظرة منك تسعدنى
أنــول بها كل أمالى
*************************************
صرت تايب
*********
هــــــو إلهى ونــــــادانى
إبعد يا عبـــــدى وخلانى
عارف طريقى كمان نادم
وصرت تايب مش جانى
********************************************
سامحنى
*********
يــــــارب إنت غفــــــور ورحيم
واللــــــى جنيته عـــــــذابه أليم
وأدعى إلهــــــى فى ســــــمائه
يسامحنى برضه دا خيره عميم
***********************************************
روح القلب
***********
يا روح القلــب بناديكى
تعالى إلهى يهـــــــديكى
وهبتك عمــرى وحياتى
وبدمى كمان أنا أفديكى
******************************************
أناديكى
*********
أناديكى حبيبتى ومش سامعة
ولهيبى فـ قلبى ونـــار والعة
وقلبى ينــــــــــادى ياحبيبتى
وعينى تزيـــــــد من الدمعة
******************************************
خليك راجل
**********
خليك راجـــــــل وإوعى تكــــون هلفوت
واصبر على بلوتك والبلوى راح هتفوت
وبيتك يلمك أحســـــــن من بيوت الناس
وبلدنا حرة وجميلة لجـل عيونها نموت
*********************************************
شد الحزام
**********
من غير كــــــلام يلا نشـــــــــد الحزام
لجل عيونها وراح نعيش فى ســـــلام
يـــــــارب احفظها كمان صـــــــــونها
وإمحى العداوة وإمحى كمان الخصام
********************************************
أسير الأحزان
************
أناديكى وكلى أشـــجان
وقلبك آسى زى ما كان
وحبسانى أنا فــ سجنك
وأسرانى مع الأحزان
*****************************************
نصيبى كده
*********
لما رميت الشبك طلع الشــــبك فاضى
هو نصيبى كده وبرضــــــه أنا راضى
ما دام دا حكم الإله وحكمه كمان نافذ
أحمد إله الكــــون وهو حاكم وقاضى
******************************************
واللهِ
*******
واللــــــهِ إنتَ الحـــــبيب
ومن قلبى إنت قــــــريب
وقلبى شـــــابك فى قلبك
وأقوله سيب وأنا أسيب
************************************
شكوكى زادت
************
واللهِ شـــــــــوفتك بعيونى
والناس خذلونى ولامونى
وقالــولى راح سـيبك منه
وشـكوكى زادت وظنونى
**************************************
طول عمرى
*********
طول عمرى كنت شاريكم وإنتم كده بايعين
وبعتوا ليه حبنا والدمــــــع ســــال م
العين
هحلف أنا بربنـــــــا إنى ما
أســـــــــــامحكم
حتى تقولوا خــــلاص إحنـــا كمان شاريين
*******************************************
جسم الوطن
*******
عمال أنادى وأصــــــــــــرخ اسمعونى ياهوه
السوس عمال ينخور إوعوا فى يوم تسيبوه
جسم الوطن صــــــــــار عليل وإحنا بنتفرج
واللى راح تمســـــــــكوه لازم كمان تصلبوه
********************************************
الجبان
********
عاملى فيها الهلالى راسم وســــــام الشجاعة
والكل عارف أساسك أصلاً فى غاية البشاعة
حاول تكون مســــتور دا الجبن راح يفضحك
وراح تعلق عيــــــــوبك على غيرك وشماعة
**************************************
الطبع غلاب
***********
عاملى فاهم وتحت باطه كتاب
وهو غبى وكلــب بينهم ساب
عذراً ياكلبى لو كنت أنا بظلمك
وطبعه خاين مش واصل حتى الكلاب
***************************************
الخراب
*********
يا خسـارة يا ناس الأرض صارت بور
راح الفرح والعيال حتى كمان السرور
يا أرض فين زرعــــك ووردك وناسك
صرتى خـراب وصـــــرتى شبه القبور
******************************************
دنيا عجيبة
*********
الشمس مالت ع الشــــــــــجر وقربت كمان
تغيب
والحر صار نسمة طرية بعد ما كان ولعة ولهيب
يا دنيــــــــا ليه طبعــــك عجيب بتعذبى
وتطبطبى
عاوزة عريس لابس قميص وتجننيه ويصير كئيب
*****************************************
اليتيم
*********
وقف اليتيم فى الصـــــــف ياخد دوره
عمال ينادى .. حنان .. لما تِعب زوره
راح الحنان فين والأســــــوة متوفرة
حنان خداع وكمان راح يحلبوا توره
************************************************
الليل هادى
********
الليل هــــادى وكله ســــكون
وتراب دارى تحته عيــــــون
وأجسام كانت عايقة ورايقة
وقبور صارت ليها ســجون
*******************************
يمكن
******
أنا راح أقـــــــرا ألف كتـــــــاب
يمكن أعــــــرف ليه أصحــــاب
بس لقيت الكــــــــــــل دا خاين
عشـــت حياتى عذاب فـ عذاب
*********************************
كراكيب
*********
كراكيبى وأفكــــــارى مباعة
وهصرخ لا سمعاً ولا طاعة
بس خــــلاص حــرمت أبيع
وهكون شـــارى بكل قناعة
***********************************
قرآنه
********
عيونى للهُدى وخدانى
وإلهى أصلح وجدانى
يكفينى إنى راح أسمع
قرآنه وهـــو العنوانى
*********************************
قلبى تاه
*******
قلبى فى حبــــك واللهِ داب
وفضلت أقرا فـ ألف كتاب
قلبك تاه وســــط الأوراق
بس لقيته بعد عــــــــذاب
***********************************
قلبك صافى
*********
قلبك صـــافى كمان وحنون
أجمل قلب حبيبى فـ الكــون
وسعادتى بتكون فـ وجودك
والصعب ويــــــــاك بيهون
**************************************
آسى عليكى
*********
طول عمرى أنا آسـى عليكى
ناسى حنانــك بجـــــرح فيكى
سامحينى حبيبتى أنا نــــــادم
ومن اليوم أنا روحى تفديكى
************************************
فكرى شريد
*********
قلبى بيســــهر طـــول الليل
فكرى شريد وجسمى عليل
هدعى إلهــــــــــى إنه يخلى
عيونى تشوفك وأبقى جميل
************************************
داعى إلهى
**********
حســــيت ببعد فقمت أنـــــا اتوضيت
وقمت أصلى وســـــاعتها أنا حسيت
بهمومى زالت وفضـــلت أنا صاحى
داعى إلهى وع التوبة برضه نويت
***************************************
فاتح الشباك
*********
فاتح أنا الشــــــــــــباك طالل على طيرى
وبإيدى زرعت الورد وكمان فتح لغيرى
ناديت أنا وصــــــرخت الصــــــبر ياربى
طول عمرى قلبى كده دايس عليه غيرى
*******************************************
غلطان حبيبى
***********
غلطان حبيبى أكيد غلطان
تارك سُــــنة كمان قــرآن
شاغل نفسك بدنيا غرورة
وجاى تقول قلبك حيران !
*****************************************
يلا اهرب
*********
يا للى ناوى تكون سليم
يلا اهـــــــرب م الجحيم
الأذان عمـــــــــال ينادى
وإنت مشـــغول بالحريم
***************************************
الأساوة
********
الأســــــــــاوة اللى فـ عنيك هيه هيه
راح أنــــادى أبوس إيديك حن شويه
مش تبقى إنت والزمان دا كتير عليا
دا اللى بيجرى فـ وريدك أكيد دا ميه
*****************************************
الصبر طيب
**********
لما أبويه مات قلـــــــت ادفنونى معاه
والكل نظر ليه وقالــــــــوا جميعاً ياه
وشيخنا قاللى الصـــــبر طيب ياابنى
أيوب لما صبر ربك م المرض نجاه
*****************************************
عبيط
*******
راح يحنن قلبه ويبقى ليـــــه وســــــــيط
ما
كنتش أعرف إنه غادر كمان وحويط
قام حنن قلبه لنفســـــه وجـــــــه يقوللى
إنسى حبيبى الوعود وطلعت إنتَ العبيط
***************************************
بدر التمام
*********
حبيت أنا بـــــدر التمام
ولقيته قاتــــــــل للغمام
وكمان وجوده فـ السما
نوَّر لنا كـــــــل الضلام
****************************************
الغرام
*******
انا قلبى تايـــه فــ الهُيــام
وحبيبى رمــاه بالســــهام
ارحم ياربى قلبى الحزين
وأنا راح أودع الغـــــرام
*************************************
عاوز أصرخ
**********
أنا عاوز أصــــــــرخ وأرفع كمان غنوتى
وأشكى أنا للكل واشــــــــرح كمان بلوتى
الصبر فرغ خــــلاص والكل مش حاسس
وراح أغنى وخلاص ولو كان على جثتى
********************************************
عيشة مملة
**********
العيشة صبحت مملة كل اللى فيها كــــــلام
وأنا اللى لسة شباب صارعمرى ألفين عام
خــــدنى العجـــب وقلــــــت أنــــــا
لروحى
ليه العجب ياجدع !! وإوعى تنسى الغرام
***************************************
إيه العمل
********
ســــــهران لوحـــدى مستنى برضه الأمل
وجــــرحى زاد ورافـــض كمــــان ينــدمل
روحت أنا للطبيب يكشــــــف على جرحى
بكى الطبيب وقال .. ما تقولى إيه العمل ؟!
*******************************************
ورقة حياتى
*********
ورقة حياتى صفرا كمان هتجف
والموت جاى وحبيبى لسة بيلف
أمانة ياحبيبى إنك تقـــول للناس
دا الدنيـا فانية ولازم عليها نتف
******************************************
قلبى اتحرق
*********
ياحبيبى قلبى من شــــوقه اتحرق
دايب فى حبك حتى جماله اتسرق
راح الحبيب وفضـــلت أنا لوحدى
ذكراه معايه وفـ إيدى حبـة ورق
****************************************
جرحى صعيب
**********
طمنى على قلبى والنبى يا طبيب
قلــــــبى هيخف ولا مش هيطيب
كشــــــف الطبيب وإلتفت قـــالى
جرحك صعيب لأنه جرح حبيب
****************************************
بابك وبابه
**********
روحت أشـــــــتكيله لقيته قـــافـــل بابه
ولبست توب المذلة وما كنت عامل حســـــابه
والخزى والعار صاحبنى وندمت على غلطتى
ووجدت باب مفتوح وراح أسعى لجنابه
******************************************
صورتك حبيبى
***********
أنا كنت ســــــــارح بفكرى يمكن أتخيلك
وأقول للعمر هـــــــدى وبرضه بستعجلك
أتارى صورتك حبيبى فى القلب مرسومة
وكان العجب !! إزاى فى يــوم أجهلك ؟؟
*******************************************
يا نن العين
**********
يا روح الروح حبانى ولا كرهانى
يا نن العين فاكـــرانى ولا نسيانى
دا مش معقــــــــــول نســـــــيتينى
وناســــــــيه حبــــــى وعنـــــوانى
*******************************************
إخس عليك
********
يامفرقين الفرح هاتولى م الفرح حبه
قلبى حزين وكمان تاهوا معاه الأطبه
ياقلبى إخس عليك راح فين علاج الله
دا قليل من القرآن بيكون علاج للأحبه
******************************************
القرار
********
قلبى حـــزين وكمــــان منهار
يمكن آخـــــد برضـــــــه قرار
إنى أتــــوب وأبعـــــد عنـــــهم
وفى النهاية طلعت " .... " !!
************************************
الغشاش
*********
عايش معانا بمليـــون وش
كــدب خــداع وكمان بتغش
فاكــــر إن الناس هتحــــبك
طلعت عبيط ياحبيبى ومفش
***********************************
البنى أدمين
*********
تعالوا نشـــــــوف البنى أدمين
فيهم الناجح وكتير فاشــــــلين
وعجبى عليكى يا دنيــا معاهم
ترفعى فاشل وتدوسى ناجحين
***************************************
أجمل أعيادى
*********
داريت أنا حزنى عن حسادى
وقلبى حزين من يوم ميلادى
بعدت ســــــــنين وأمى معايا
ولقاك أجمـــــــل أعيــــــــادى
******************************************
إنت حياتى
*********
إنت حيــــــــاتى وصبحى وأمسى
وجسمى عليل يرتــــــاح باللمسى
ما إنت حبيبى وكـــــــــــــل حياتى
فـ لحظة طيش أو حتى فـ همسى
***************************************
سبب انتحارى
***********
كنت فى يوم إنت اختيارى
وجيت اليوم أنا باعتذارى
وهلوم روحى مش راح ألومك
وهتكون إنت سبب انتحارى
***********************************
مالى سواك
********
ياجبيب عمرى ما لى سواك
ماشية معاك على الأشواك
وإنت الغالى كمان ياحبيبى
ومهما تغيب أنا بستناك
****************************************
سبب ألمى
********
قريت كلام ربنا حسيت أنا بخشوع
وقلبى حس بألم كمان ألم فى الضلوع
أنا قلت ياهل ترى إيه سبب ألمى ؟
أتاريه بعادى وجودى ياعينى بالدموع
*******************************************
إيه المسموح
*************
أنا قلبى فى حبــــك مجروح
بتيجى حبيبى يومين وتروح
يا اللى هواك حيرنى معــاك
ما تقـولى إيه المســـــــموح
***************************************
كيف كيفك
***********
إدلــــــع على كيف كيفك
عايزاك تعرف إيـــه تكليفك
إنك تبقى بـــــر أمــــــــانى
وياخسارة مكسورة مجاديفك
***************************************
بالك رايق
**********
عايشة اليوم أحسن أحوالى
بالك رايـــــق وكمــان بالى
وإمسـح دمع عيونى بإيديك
ما إنت حبيبى وعمرى ياغالى
**************************************
كاس المُر
***********
الحزن اللى إحنا عايشينه
وظلمك برضــــه عارفينه
وقيدك لســــــــة فى إيدى
وكاس المُر شـــــــاربينه
***********************************
هشكيه لأمه
************
دموعى نزلت خلاص وهو ولا همه
وسقانى كاسه وشـــــــربت أنا سِمه
واللهِ لأفضـــل أحبــــه مهما لامونى
ولو عناده زاد هشــــكيه بقى لأمه
***************************************
حظى قليل
*********
موتى حبيبى ما لوش بديل
وفراقك ليه دا مســــــتحيل
والعين باكية والدمع سايل
وحظى يا دنيــا فيكى قليل
************************************
خدعتينى
*********
اتخدعت أنا فيكى ساعات
وشوفت معاكى عذاب وآهات
وسنين عمرى ضاعت ببلاش
ما زهقتيش من قــولــة هات
*******************************************
السراب
**********
من النهـــاردة مفيش عتاب
وحبيبى جاى من بعد غياب
وجوابه جــالى وكنت سعيد
وقريت كلامه لقيته سـراب
****************************************
الضلام
********
لما دخلت القبور رميت عليهم سلام
ما حد رد عليا وما سمعت منهم كلام
وإزاى يـــردوا عليــا وهمــا مدفونين
وبإختصار العبارة حياتنا كانت ضلام
********************************************
مش هتنفعنى
************
النفس غفلانة وعايشة برضه ذليلة
ناسية اللى جاى وكمان ذنوبها التقيلة
ويـا ويلى قصـــــرت أنـــــا فى واجبى
ومش هتنفعنى سوسو وميمى وجميلة
****************************************
هفضل ساكت
***********
ســاكت ولكن جــــــوه قلبى كــــــلام
ولو أنا اتكلمت يمكن تـــــزول الآلام
لكن نصيبى كده وهفضـل أنا سـاكت
وهعيش حياتى ع الوهــــم والأحلام
***************************************
ليست هناك تعليقات:
إرسال تعليق